بين النقيضين ..!!

أبسألك يا حلم عمري سؤالين
ما حان وقت الحب بينك وبيني؟
الى متى وانتي من الحب تقفين
والى متى يا شوق تتجاهليني؟
يا طفلة في حب غيري تموتين
وانتي غرامك هد قلبي وعي
الى متى في الحب نبقى غريبين
والى متى حبك يسهّر جفوني؟
والى متى بيبان قلبك تصكين
والقلب صاير في غرامك سجيني
قولي أحبك يا هنا القلب تكفين
ومن الصحاري القاحلة جمعيني
ليتك على صدري تجين وتنامين
واحضنك وآمرر بشعرك يديني
واتم اسولف لك سواليف قلبين
وتحكي لك دموعي وشوقي حنيني
واجمع قصايد حبك اللي تعرفين
واظل اغنيها بلحن حزيني
يمكن مع حزني بحبي تحسين
ترى بهذا البعد بتجننيني
مهما حصل لك في الهوى لا تخافين
قوي عزومك يا حبيبة عيوني
حطي يدك في ايدي ونحيا حبيبين
ونعيش انا وياك باقي سنيني
ادري كلامي مثل كل المحبين
بس آتمنى منك اتجربيني
انا أحبك حب اغلى من العين
ودمعات عيني تحكي الحب فيني
انا احبك حب يكفي ملايين
ويروي ضما العشاق بس افهميني
بعض الغلا لا حل في القلب يا زين
يشفيه لو دامت جروحه سنيني
وبعض الغلا ما تدري يوصلك وين
ياخذك لدروب الهلاك المبيني
وبعض الغلا نعمة ونحفظه في العين
وبعض الغلا نقمة على العاشقيني
وانتي غرامك لم بين النقيضين
كل المشاعر في غرامك تجيني
حزن وفرح شوق وألم جرح جرحين
طب ودوا عقل وجنون اسأليني
رضيت حبك ودي اعشقك هالحين
واخر كلام انتي الغلا صدقيني
حبي انا وياك يبدا ببيتين
وما ينتهي الا بعد ما تدفنيني
حبي وفا ما يختلف فيه شخصين
وصورة خيالك ترتسم وسط عيني
هذي بيوتي جاتك اربع وعشرين
مدري على المسحوب والا الهجيني

منقول

شعر / علي الشمراني